Málefnahópi um peningamálstjórnun og evruna er ætlað að fjalla um áhrif aðildar að Evrópusambandinu á peningamálstjórnun hér á landi. Hópnum er einnig ætlað að skoða möguleika á einhliða eða tvíhliða upptöku evru og eða upptöku hugsanlegra annarra gjaldmiðla.
Svara þarf lykilspurningum um hver yrðu áhrif á gengi, vexti, hagvöxt, erlenda fjárfestingu, afkomu heimilanna, ríkisreksturinn, hagstjórnina ofl. þætti.
Hópnum er stýrt af Gylfa Zoega og Ársæli Valfells.
Núverandi skipulag peningamála sem felst í sjálfstæðum gjaldmiðli, fljótandi gengi og verðbólgumarkmiði hefur ýmsa kosti; gefur sveigjanleika og sjálfstæði í stjórn peningamála. Reynsla síðustu ára sýnir hins vegar að þessir kostir eru of dýru verði keyptir. Ekki hefur reynst mögulegt að hafa stjórn á verðbólgu, skuldsetningu og eignaverðbólum í hagkerfi okkar þar sem hafa farið saman fljótandi gengi sjálfstæðs gjaldmiðils, frelsi í fjármagnsflutningum á milli landa og einkareknir bankar. Þótt orsök kreppunnar, og einnig uppsveiflunnar árin á undan, sé að finna á alþjóðlegum fjármálamörkuðum þá gerði fyrirkomulag gengi- og peningamála Ísland ákaflega viðkvæmt fyrir slíkum sveiflum. Hrunið nú í haust varð verra en það hefði orðið ef Ísland hefði búið við öruggt fastgengiskerfi eins og mörg önnur Evrópulönd. Sömuleiðis væru erfiðleikar í rekstri fyrirtækja minni. Ekki tókst heldur að hemja uppsveifluna árin 2003-2007. Þessir hafa verið tæknilegir erfiðleikar í afar smáu hagkerfi; of smáu til þess að geta með góðu móti haft sjálfstæða mynt og fullt frelsi í flutningum fjármagns á milli landa.
Upptaka fasts gengis krefst annaðhvort aðildar að ESB (sjá greinargerð Gylfa Zoega "Kostir ESB aðildar" meðal "skjala") eða einhliða upptöku annars gjaldmiðils (sjá greinargerð Ársæls Valfells "Myntráð og einhliða upptaka evru" meðal skjala).